A medida que pasan os anos e vou coñecendo mais sitios, observo a realidade con mais atención. Na actualidade, non acostumo a acumular moitas imaxes que, probablemente, nunca volverei ver. Non obstante, neste caso fágoo considerando que debo rexistrar a evolución da miña experiencia dentro do programa “Vacacións con traballo”.
Cabo Verde xa era un país coñecido, pero non a illa de Santo Antão.
Durante este día ocupamos parte do tempo en coñecer as instalacións e traballadores da cámara municipal de Porto Novo. O edificio orixinario de carácter colonial aínda é utilizado pero as súas instalacións quedaron pequenas para todos os servizos que prestan, que están dispersos en diferentes lugares.
Vista do edificio orixinario do Municipio de Porto Novo
Non obstante, a cámara municipal está facendo un importante esforzo para construír un edificio novo no que todos os servizos estean centralizados. A continuación, móstrase unha imaxe do mesmo que entrará en funcionamento durante o presente mes de outubro.
Vista do novo edificio da cámara municipal
O resto do tempo foi dedicado á consulta do portal de administración electrónica da República de Cabo Verde. Resulta sorprendente ver que xa prestan cantidade de servizos telemáticos cuxa implantación nin sequera está prevista en moitas administracións europeas. O enderezo web do portal é www.portondinosilha.cv . Neste portal, os cidadáns de Cabo Verde poden realizar numerosos trámites ante as administracións públicas: solicitar certificados, crear unha empresa, realizar pagamentos de taxas e impostos, consultar o catastro, etc.
Portal de acceso á administración electrónica
06/10/2011
Asistencia a unha charla de D. Amadeu Cruz, presidente da Cámara municipal de Porto Novo. Esta charla consistiu nunha reunión de traballo do presidente con un grupo de estudantes do último curso da carreira de xornalismo da Universidade de Cabo Verde patrocinados polo xornal “A Nação”.
D. Amadeo Cruz, alcalde de Porto Novo
O tema da charla foi “Desenvolvemento en Porto Novo”. E a continuación engado unha síntese das palabras do presidente:
A cidade foi creada en 1962, cando o goberno portugués decidiu crear o municipio mediante decreto. É o concello mais urbano, ocupa 2/3 da illa e posúe arredor duns 18.000 habitantes. Os sectores produtivos son a agricultura, a pesca o sector pecuario e o sector servizos. Tamén posúe recursos hídricos, fundamentais para a supervivencia nunha illa. No ámbito da cultura, posúe referencias culturais como a romaría de São João Baptista e ten pouco patrimonio arquitectónico construído.
As liñas mestras para a política económica son:
1.- A capacitación dos recursos humanos. Non pode haber desenvolvemento sen capacitación dos recursos humanos. Para saír da pobreza é necesario ter acceso ao coñecemento. 2.- A iniciativa privada é o motor do desenvolvemento económico – empresarial. Débese favorecer o investimento privado independentemente da súa orixe e eliminar barreiras sobre os investimentos. 3.- Loita contra a exclusión social. A poboación non pode ser dependente da boa vontade do estado. A liberdade do ser humano depende da súa capacidade de realizar os seus soños. Para loitar contra a exclusión social débese apostar polo desenvolvemento económico e pola educación. Neste sentido, a cámara municipal ten políticas activas básicas de asistencia social, saúde, etc. 4.- Bens e servizos públicos comúns. Infraestruturas: porto marítimo, auga, telecomunicacións, estradas, infraestruturas para a pesca, saneamento básico, etc.
Os puntos fortes de Porto Novo son:
1.- Pesca. 2.- Sector pecuario extensivo e intensivo. 3.- Horticultura, xa que hai reservas de auga e condicións para intensificala. 4.- Potencial para desenvolver a industria de transformación. 5.- Vínculo directo co resto do país; o turismo sostible axudará a desenvolver o resto dos sectores. Segundo o presidente, “o país necesita pensar no que non é evidente”. Propón como idea que Santo Antão pode acoller o aeroporto de São Vicente (outra illa), xa que este último ten pouco potencial de desenvolvemento. Tamén se debe potenciar o turismo interno.
Os puntos fracos de Porto Novo son:
1.- Excesivo partidismo e politización dos asuntos. Débese discutir a proposta en si mesma, sen ver que partido a propón. 2.- Pouca presenza de industria. 3.- Ausencia de suficientes técnicos (fuga de cerebros). 4.- Infraestruturas mellorables. 5.- Baixa divulgación das potencialidades
Logo das preguntas realizadas polos estudantes de xornalismo, a charla rematou con unha chamada á responsabilidade dos mesmos no sentido de que proxectasen nos seus artigos unha visión positiva do concello.
Ao rematar a reunión, a miña impresión é que as consignas que se deron sobre desenvolvemento local son aplicables á moitos territorios supostamente desenvolvidos. A maioría dos problemas son comúns, pero a diferenza radica na cantidade de fondos dispoñible para resolvelos.
Vista parcial dos asistentes á reunión
Á hora de comer tiven a oportunidade de ir a un establecemento hostaleiro bastante inaccesible da illa. A paisaxe era incrible. Fun invitado polo concello a través da “Confraria do grogue de Santo Antão”. O grogue é unha augardente derivada da destilación do líquido procedente da cana de azucre. Esta agrupación constitúese nunha especie de sociedade gastronómica que neste caso celebraba un encontro con persoeiros das illas Açores. Rodaban un documental gastronómico para a Radio Televisión Portuguesa (RTP) que formaba parte dunha serie chamada “Sabores das Ilhas”. Teñen un grupo homónimo en Facebook.
Escudo da “Confraria do grogue de Santo Antão”
Vista do lugar
07/10/2011
O programa de traballo deste día centrouse na asistencia a unha reunión con diversos técnicos da cámara municipal e na análise dunha convocatoria de subvención da obra social de “La Caixa” (Programa de Ayudas a proyectos de formación en África – bases 2011). Á primeira vista, esta convocatoria xa non se adaptaba por razón da materia ás necesidades da cámara municipal de Porto Novo. Non obstante, foi analizada polo miúdo para ver se se podería realizar total ou parcialmente algunha acción e/ou actividade. Finalmente foi descartada.
Fonte: http://obrasocial.lacaixa.es/
